Ausgabe: Titelaufnahme in DRQEdit. Dort auch weiterführende Literatur. Angaben der digitalisierenden Bibliothek: BSB-Eintrag. Moderne Edition: Rhetorica deutsch. Rhetorikschriften des 15. Jahrhunderts. Herausgegeben von Joachim Knape und Bernhard Roll (Wiesbaden 2002). Darin: Ordnung des Gerichts. Hrsg. von Bernhard Roll. S. 289 — 321. Ältere Edition 1837: Quellenangabe des Deutschen Rechtswörterbuchs
Die Transkription ist nach dem Exemplar der Bayerischen Staatsbibliothek vorgenommen und mit der Edition von B. Roll verglichen worden. Die von Roll eingefügte Gliederung des Textes wurde hier (in eckigen Klammern) übernommen.
[1] JN dem namen der heÿligen vnd vnteilperen triuaͤltikeÿt Amen ¶Von ordnung ze reden / vnd besunder zuͦ angedingtem freüntlichem rechten. So woͤllen alle die / die in disem puͦch lesen / auff mercken / was sÿ lesen / vnd nicht sorgen wa das geschriben stande / oder wer das geseczt hab. Denn soͤliche allegaciones / das ist anzeÿgen wa ÿedes grüntlich auß gee / nit von vnwissen des tichters sunder von kürcze vnd verkerens wegen auß gelassen sind / vnd nach volgen dem meÿster Seneca. Non cura quis dicat etc. Nit acht / wer / sunder waz geseczt werde. Et rosa ex spinis orta nequaquam plasphematur. Vnd als ein wolschmaͤckende rosa auß einem groben doren nit verachtet würt Also würt auch ein guͦte lere von einem schlechten menschen auß gangen in des weÿsen menschen gehoͤrde nit verachtet. [Seite: 2] => Faksimile [2] Als eins ÿeden fürsichtigen / also eins ÿeden außsprechers oder getichters / ist die ordnunge Vnd ein ÿede ordnung würt geschickt in ein ende. Quia finis concludit omnia. Dann das end beschleüßt alle ding / A fine eciam omnia denominanda sunt. Es sind auch alle ding nach dem ende ze benennen. Et qualem te inuenio / talem te iudico. Vnd welchen ich dich finde / den selben vrteÿl ich dich etc.
Darumb so ordiniere ein ÿeder redner vnd tichter in seinem gemuͤt das ennd seiner red vnd getichtes. Vnd ist zweÿerleÿ ennde. Propinquus et remotus. Nache vnd verr oder endtlich ennd. Nache / als ein ÿede rede oder begerung hat ein ennde. Daz verr oder endtlich ende / ist die beschliessung.
[3] Ein harpffer oder spilman hat vier eÿgenschafft: Des ersten macht er ein praeambel [Seite: 3] => Faksimile oder vorlauff / das er die leüt im auff ze mercken bewege. ¶Darnach macht er guͦt vnderschidlich tact vnd mensur / das er dÿe vorbewegten froͤlich vnd vnuerdrossen mache. ¶Darnach begert er gabe, die würt im gewonlich / als er guͦts oder arges gemacht hat. Darnach behellt er dÿe gab
Also sol ein ÿeder redner / die vier eÿgenschafft auch an im haben. ¶Zuͦm ersten ein vorred ze tuͦn / mit züchtigen / ganczen verstäntlichen wortten / nach gestalt der personen / in ze hoͤren begeren etc. ¶Darnach sein klag / meldung / oder begerunge kurcz / lawter vnd bewaͤrlich / dar seczen. Kurtz. Dann lange wort oder geschrifftt macht verdriessen. Lauter / dann verdeckte wort machen irrung. Bewaͤrlich / dz dein klage oder begerunge bewaͤrt oder [Seite: 4] => Faksimile gerecht seÿ. Nach dem er also geredt vnd fürpracht hat / so bitt er / dz darauff zimlich vnd gepürlich ist. Vnd was im dann geantwurt gegeben oder gesprochen würt, Das behellt er.
Welcher daz recht suͦchet / der sol sein veste / weÿß / vnd greẅliih oder ernstlich Jus querens sit firmus, sapiens atque crudelis. Nichts darinne nach geben.
Sich alle weg wol vnderrichten vnd bedencken / dz er sein anfang mittel vnd ennde geleich auff einander secze etc.
Laß im seine wort oder schriffte nit verfachen / verennderen noch verkeren.
[4] Gibe vnd lege zuͦ einem ÿeden sein praedicat dz ist titel / des stands Alz [4.1] aim Roͤmischen [Seite: 5] => Faksimile keÿser oder künig: Allergenaͤdigister durchleuchtigister Großmaͤchtigister fürste vnd herre / eẅr keÿserlich oder küngliche maiestat etc.
Einem erczherczogen: ¶Durchleüchtigister fürst vnd herre / eẅr fürstliche genade etc.
Einem Marggraffen oder schlechten herczogen: Durchleüchger fürste vnd herre eẅr fürstlich genade etc. ¶Einem Grafen von herczogischen stamm: Hochgeporner. Einem schlechten grafen: Wolgeporner vnd ÿedem: eẅr genad ¶Einem freÿen Edlen ¶Einem ritter Strengen ¶Einem edlen turnierer: Frommen vnd vesten. ¶Einem schlechten edelman: Vesten vnd erberen. Einem Burgermeÿster vnd rate: Fürsichtig Ersamme / erber vnd weÿse. Darnach die stat ist. ¶Einem pawren: Bescheiden
[4.2] Einem Bapst. Aller heÿligister vater eẅr heÿligkeÿt. ¶Einem Cardinale, [Seite: 6] => Faksimile oder patriarchen / oder Erczbischoff: Hochwirdigister in got / vater vnd genädigister herre / eẅr vaͤterlich oder fürstlich genade. ¶Einem Bischoff oder gefürsten abbte des reichs: Hochwirdiger fürst genaͤdiger herre. Sprich / ein gefürster apte des reichs. Dann nit ein ÿeder geinfulierter abbte ist gefürstet / sunder die / die ire regalia als ander fürsten / haben. Dz sint die vier Ampte / lehen / gerichte / gejaͤgde. ¶Einem abbt Tumprobst Techant: Erwirdiger genaͤdiger herre. ¶Einem doctor: Hoch gelert oder wolgelert. Einem priester: Ersam etc.
[5] Rede mit der zungen / nit mit den henden. Halt dein haubt staͤte. Red senfftmuͤticlich mitt mitler stymm / quia discrecio est mater virtutum. Dann zucht vnd bescheidenheit ist [Seite: 7] => Faksimile ein muͦter der tugent. Vnd alz verr er mag, so secz zuͦ seiner rede etlich beÿspil oder vrteÿl / denn dar durch würt er sere gelobet vnd weis gezelt. Er zeücht auch die auffmercker da mit an sich Vnd ist / dz er mer denn ein vrsach hat / so secz die treffenlichisten ze letst. Dann gewonlich dz letst dem menschen vernaͤmlicher vnd einfaͤlliger ist ze behalten / denn das erste
Laß seinen widerteÿl auß reden. Redet er ÿchtz / das er bezeügen woͤll / so sprich nit mer denn protestor oder protestamur. Jch bitt eüch des ze gedencken / oder wir bitten eüch etc. Vnd vor allen dingen / laß sich nit erzürnen. Vermerck behend. Gib nit schnell antwurt. Dann Sit omnis homo velox ad audiendum. Ein ÿeder mensch seÿ behend ze hören, Aber traͤg ze reden vnd zuͦ zoren [Seite: 8] => Faksimile wann der zoren des mannes würckt nit dÿe gerechtikeÿt gottes.
[1.1] Gericht ist ein werck / da dreÿ person zuͦ samen kommen in rechte / dz ist ein Richter / ein klager / vnd ein antwurter / vnd heißt in latein Judicium.
RJchter ist einer der die fürprachten sachen vnderscheidet / oder enntlich vrteilet vnd richtet. Vnd heÿßt Richter von der gerechtikeit / als ein recht richter. Dann / wenn er nit recht richtet / so heißt er kein richter. Vnd heißt zuͦ latein Judex. Vnd sind dreÿerleÿ richter: Ordinarius: ordenlich richter / die haben eÿgen gerichtes zwang. Als Baͤpste Keÿser künig [Seite: 9] => Faksimile Bischoff fürsten Proͤbste Dechant Voͤgte vnd burggraffen etc. Delegatus: Nach gesaczt Richter die sich geprauchen eins empfolhen gerichtszwangs / alz die Commissari eÿns bapsts oder eÿns keÿsers. Arbiter: Verwillkürt Richter / auff dÿe bed teyl sich mit willen vereinen als durch compromiß oder anlaß. Vnd wenn ein ober ordenlicher richter / seinem commissari vnd nach gesacztem richter / gewalt gibt ander richtere auch nach im ze seczen vnd subdelegieren, Die heissend subdelegati.
Aduocatus oder patronus: Einer der ein sach beschirmet. Alz ein anweiser. Ein verleÿmter: das ist infamis. Ein plinder / das ist cecus. Ein knecht / daz ist seruus. Ein münch / dz ist monachus. Ein kind / das ist puer. Ein geregelter chorherre: Das ist Canonicus regularis. Ein [Seite: 10] => Faksimile priester / das ist / sacerdos. Sol ir keiner Aduocat / patron noch anweiser sein / denn ein münich oder korherre / in sachen irer kirchen / vnd von gepot irer aͤbbte vnd oberer / dÿe mügen aduocaten sein. Ein priester mag in vier sachen Aduocat sein / in seiner eÿgen sach. Jn seiner kirchen sache. Jn seiner naͤchsten freẅnd sache / vnd in einer ellenden weÿßlosen person sach / als einer witiben / waÿsen / oder lamen.
Assessor: Einer der beÿ einem richter siczt / vnd in vnderweÿßt / ob der richter nicht schrifft weiß ist / der heyßt ein beÿsiczer.
Procurator: Gewalts haber. Einer der von gepot oder lieb seins herren oder guͦten freẅnds / eine oder mer sach ze klagen oder ze verantwurten / oder zuͦ in beÿden an sich oder auff nÿmpt. Ritter / frawen [Seite: 11] => Faksimile Paͤmig, Jn aͤcht oder aberaͤcht / kind / pauren süllen nit gewalthaber sein. Vnd dz merck / alz staͤtig procuratores / oder weibel eins gerichts.
Auditor: einer der dÿe sach gar oder ein artickel / als zeügen / oder ein krancken durch befelchnus eins richters / verhöret vnd heißt ein verhoͤrer oder Commissari.
Notari: Offenschreiber beÿ dem richter. Gericht / klager / antwurter / zeẅgen. Aduocat / procurat / oder Auditor / ze sein steet in gewonheit vnd ordnung des lands. Actor: ein klager. ¶Actores / vil clager. Reus: ein antwurter. Rei: vil antwurter. Testis / ein zeẅg. ¶Testes: vil zeẅgen. Vnuerscheÿdenlichen / daz ist insolidum. Jurisdictio: ¶Gerichtszwang. Substituere procuratores: ¶Ander gewaltshaber seczen. [Seite: 12] => Faksimile
[2.1] DEr Richter sol dem antwurter fürbieten auff ein genanten tage vnd zeit. Vnd als er kompt Jm des klagers begerung / das ist libell schrifftlich geben. Darauff im der antwurter ein bedencken nÿmpt / sich mit dem klager guͤtlich ze vertragen / oder rechtlich mit im ze krÿegen. Vnd als das bedencken geendet / vnd die sach guͤtlich nit vertragen ist / kommen bed teil wider für gerichte. Vnd hat der antwurter nit außzüg / da mit er dem gerichte entweichen müge / so sol er dem klager antwurten. Daz ist sein bekennen oder laugnen. Vnd soͤlich bekennen oder laugnen heißt litis contestacio: Des krieges oder rechtens andingung. Vnd sich sÿ also gegen einander angedingt haben / so sol der Richter von in nemen den eÿd calumnie
[Seite: 13] => Faksimile das ist vermeÿden alle falscheÿt. Darnach auff den eÿd / sÿ fragen vnd verhoͤren nach notdurfft vmb die haubtsach. Nach dem articulierend beid teile / vnd machen replicaciones / widerred / excepciones außzüg Duplicieren / triplicieren / quadruplicieren. Das sind schrifften oder rede / da mit einer dem anderen / sein allegacion / vrsache einred oder anders prechen will / nach dem vnd die sach groß oder klein ist / vnd ÿedes teÿls notdurfft eÿschet. Es laÿtendt auch die teile auff das ir gezeẅgen briefe vnd alle ir notdurffte / vnd geben Jnterrogatoria / das sind eines teÿls artickel. Darauff man des anderen teÿls zeẅgen auch fraget. Nach dem allem werden geoffnet der zeẅgen sage / in gegenwürtikeÿt beider teÿle / dar zuͦ ÿeder teyle sein not praucht vnd redt. Alz dann beschliessent [Seite: 14] => Faksimile baid teile / vnd seczend das zuͦm rechten. So sol sich der richter gnuͦgsamlichen vnder weÿsen vnd die sachen entscheiden mitt seiner vrteÿle / von der / ob sÿ nit gerecht ist / ÿetweder teile sich beruͤffen / vnd appellieren mag.
[2.2] ¶Die Ordnung ist begriffen. Judex primo reum citat. et post hoc liber illi fertur Et inducie dantur de re que petita. Lis contestatur / sequitur calumnia partes. Querantur testes / ac instrumenta sequantur. Producti manifestentur super hÿs placiture Diffinitiua post hec sentencia detur. Que mala si fuerit / datur appellacio partis.
[3.1] [3.1.1] CJtacion oder fürgepot ist ein anefang einer ÿeden sach. Also dz nach innhalt der gesaczten rechte / die sach durch die citacz vnd fürgepot an gefangen ist. Vnd waͤr / dz sich ÿemant nach dem fürpot [Seite: 15] => Faksimile seczen vnd ziechen woͤlt, dz hatt nit krafft. Dann in das fürpott begriffen vnd fürkommen hatt vnd ist schuldig vmb die sach allda zeantwurten.
Vnd man sol vnd mag einem ÿeden ze dreÿen malen vmb ein sach fürpieten ÿedsmals ze xiiij· tagen. Doch ist besser vnd gewisser man secz vnd benenne im / in einer citacion dreÿ tag. Als xlv tage / xv für den ersten / xv für den anderen / vnd xv für den dritten vnd letsten rechttage / vnd dz heißt citacio peremptoria / ein enntlich fürpot.
Vnd ein ÿeder nach gesaczter Richter sol die Conmission im von seinem oberen zuͦgesandt / in die citacion vnd ladung von wort zuͦ worte seczen.
[3.1.2] Der richter sol nÿemant citieren noch vrteil sprechen an gepoten feÿrtagen dann es [Seite: 16] => Faksimile hat nit krafft. Vnd ist ze mercken / dz dreÿerleÿ feÿrtag sind: Solemnes hochzeitlich. Dÿe in der ere gottes vnd der heÿligen alt herkommen sind. Vnd an welchen / dÿe priester dem volck loblich singen / predigen vnd verkuͤnden. Vnd ob die partheÿen darein verwilligten / dennocht hat es nit krafft. Rustice Pawren feÿrtag: Die von nucz vnd notdurfft wegen der menschheÿt herpracht sind als die zeit der aͤrend vnd des wymmets. Doch wenn die partheÿen das verwilligen / so hat es krafft. Repentine sind nit in gewonheit. Als da ein fürst den tag seiner gepurt eret oder der gepurt seins suns / oder dem sÿg seiner veinde.
[3.1.3] KOmpt vnd erscheint der antwurter nit, So heißt er vngehorsam, das ist contumax. Vnd dann sol der [Seite: 17] => Faksimile Richter auff des klagers begeren / richten über in / Als über ein vngehorsamen mit dem pann / oder sunst nach gestalt der sachen. Jst im anderst das fürgepot rechtlich verkünndt / vnd wenndet in nit eehaffte not. Das ist vngeuarliche faͤngknuß, Siechtumb / der weder zuͦ kirchen noch zuͦ strasse mag geen / vnd herren not / Vnd wilde wasser / vnd der beÿ dem land nit waͤre ongefarlichen.
Declinare forum. Heÿßt die sach in ein ander gericht ziechen.
Defendere: ¶beschirmen. Respondere: ¶antwurten. Immutare procuratores: Die redner verwandelnn. ¶Processus: ¶gerichtzhandel. Inhibicion: ¶verpottbriefe. Non comparere: ¶nit erscheinen. Comparere: ¶erscheinen. [Seite: 18] => Faksimile Accusare: ¶versagen. Accusare contumaciam. dÿe vngehorsamm beklagen.
[3.1.4] Erscheint aber der antwurter / vnd der klager auß pleibt, So sol er warten / vnd geÿt man im ein expectancz / vnd sol im der klager die schaͤden abtuͦn Vnd sol begeren in der clag / vnd des gerichts ledig zesprechen. Darnach vnd die sache gestalt vnd groß oder klein ist.
Interpellare: Da ein teil ein / fürpot oder anzüge zuͦ erlengeren durch eehafft not von dem gerichte / zuͦ rechter zeit erlangt vnd das dem widerteÿl verkündet / vnd ander tag benennt.
Prorogare. Da ein obroster richter ein genad / freÿheÿt oder auffschlage einer sach erlengert. [Seite: 19] => Faksimile Suspendere / da man ein sach oder recht auffschlecht
ERscheint aber der antwurter vnd gepüret im außnemunge / daz ist excepciones oder einrede / die sol er tuͦn / ob er will. Vnd außnemung / das ist excepcion, ist zweÿerleÿ. Eins heißt dilatoria: Durch die allein die sach verzogen vnd nit geendet württ Als da der antwurter auß nÿmpt / daz ist excepiert wider den richter. Daz er verleẅmpt, Jm banne, Jm arckwoͤnig oder sein veind / vnd villeicht des klagers freünd seÿ etc.
Deßgeleichen wider den klager / oder sein gewalthaber / oder den gewaltzbrieff / dz ist procuratorium oder mandatum / oder wider den gerichtszwang / oder wider die commission oder citacion etc. Vnd wenn er die hat / so würt er nit mer / denn des gerichts auff das mal ledig / vnd nicht der klage. [Seite: 20] => Faksimile Das ander heißt. Excepcio peremptoria: die die klag vnd die meÿnung des klagers daͤmpt vnd nider truckt. Alz da einer anklagt würt vmb eÿn schuld. Er antwurt also: Jch bin vnlaugen / ich bin dir dz schuldig gewesen / du hast mirs aber nach gelassen / oder ich bin mitt dir vertaͤdinget oder eins worden / das du mich darumb nit rechtfertigen noch an langnen solt / vnd als er das kund macht / so würt er der klage vnd des gerichts ledig gesprochen.
[3.2] [3.2.1] Hat aber der antwurter der obgeschriben außnemung keine / da mit er die sach dannen noch ab im schÿeben müge So ist er schuldig dem klager ze antwurten / vnd sol im die klag geschriben geben werden alz durch vnd in aim libelle. Das sol der klager / ist es ein sach die man billichen in geschrifft geÿt von stund an dem richter [Seite: 21] => Faksimile vnd als denn der richter das / vnd dar zuͦ xx. tag dem antwurter geben, Jn den er sich bedencke / ob er der klage weÿchen / oder der widersteen woͤlle.
Vnd sol gar / clar / schlecht vnd lauter gemachet sein, Das der antwurter gar eÿgentlich versteen müge / warumb er angelanget werde. Wa es nicht also waͤre, so mag man darein reden / vnd ist im nit schuldig ze antwurten, Als lang biß das also gemacht würt. Vnd mag der antwurter dem klager vmb soͤlich saͤumsal in vmb [Seite: 22] => Faksimile sein expenß vnd koste ze sprechen. Dann der klager sol mit gefaßtem schilte in dz recht steen.
[3.2.2] Jtem es ist grosser vnderschÿd in den klagen ze seczen nach dem ein klage vil mer denn die ander gefreÿet ist. Als vmb entseczung einer gewere on rechte. Das heißt Spolium. Ein besuͦche auff eines anderen grund vnd podem heißt possessorium. Vmb grund vnd podem heißt petitorium. Vmb ÿnzicht oder mißhandlung / heißt actio iniuriarum. Vmb missetat / heÿßtt actio criminalis. Vmb zechenden Actio decimarum. Vnd ist auch grosser vnderschid vnder den personen / dÿe gegen einander in recht steend. Dar von vil ze schreÿben waͤre. Aber es ist eÿnem laÿen ze ÿrrig. Darumb so sol der klager / sich vor gar wol mit weÿsen gelerten leuͦten vnderreden vnd ermessen, Jn welchen wege er sein [Seite: 23] => Faksimile clage dar seczen vnd pringen müge. Vnd auch allweg an sechen die landtlaͤuff vnd gewonheÿt So mag auch der klager / zuͦ zeÿten sein klage von kürcze wegen nicht in bibells weis / sunder per modum posce sumarie / dar legen. Daz hat alles besunder forme, Als denn die procuratores / der gesaczten gerichte / besunder formulari darzuͦ haben etc.
[3.3] [3.3.1] SO nun die .xx. tag vergangen / vnd die partheÿen mit einander nicht vereÿnt sind, So kommen sÿ wider für gerichte. Vnd bekennet / oder laugent da der antwurter dem klager auff dz bibell etc.
Vnd durch sölich bekennen oder laugnen würt die sach erst im rechten / rechtlich verfangen / vnd der kriege an gedinget / vnd heißt litis contestacio.
Vnd ist zemercken / dz alle obgeschriben [Seite: 24] => Faksimile außnemung wider den richter / gerichtszwange / den klagere / procurator / anweiser / commision / procuratorium oder citacion / süllen beschechen vor litis contestacionem. Als ÿecz gemelt ist. Dann sÿ werden hernach nit gehoͤrt / vnd haben auch nit mer krafft.
Mer ist ze mercken / will der antwurter von dem klager wider recht haben / das heißt / reconuencio. Dz sol er auch vorderen vor litis contestacionem. Vnd wenn der klager sein libell übergeben hat sein libell oder informacion auch übergeben / so württ es ein rechtsacze / vnd miteinander zuͦ gen. Dann taͤt er das nit / vor litis contestacionem So mag er daz nit mer tuͦn / biß des klagers sach vollenndt ist etc.
[3.3.2] VOn stund als der krieg vnd die sach also contestiert vnd in recht verfangen ist, [Seite: 25] => Faksimile So sol der richter beÿden teilen erkennen vnd geben den eÿde, Der da heißt Juramentum calumnie. Der stat also Der klager sol gelauben / sein sach gerecht sein / deß geleichen der antwurter / vnd wenn er gefragt / die warheÿt sagen woͤlle / vnd sich keiner falschen gezeügknuß geprauchen noch behelffen / noch züge vnd taͤge dz die sach verzogen werd / begeren woͤlle.
Jtem ÿeder teil sol schweren / dz er nichtz geben oder verheissen hab / noch verheissen oder geben woͤlle. Darumb das vrteÿl für in gesprochen werd.
Vnd welcher teÿl nit also schweren woͤlt, der hat sein / klagen / oder laugnen in der sach verloren. Vnd der eÿde ist darumb erfunden vnd auff gesaczt / dz die leüt sich wol bedencken / vnd nicht geringe schweren / sich guͦt sachen haben ze gelauben. [Seite: 26] => Faksimile
[3.3.3] Nach dem eide sol der richter die partheÿen forschen vnd verhoͤren / vnd süllen die aduocaten der partheÿen / dÿe artickel / darauff man ÿeden teile fragen sol / machen / vnd dem richter geben. Vnd soͤlich artickel süllen das vorüber geben libell gar lauter erklaͤren: Wie / warumb / was / wenn / wo daz beschechen seÿ / wer da beÿ gewesen seÿ / nach dem vnd dann dÿe sach gestalt ist. Vnd was also ÿeder teil bekennet / das sol verzeichent vnd verschriben werden von den aduocaten, Die auch dar beÿ sein süllend. Vnd alles das der antwurter in recht bekennet vnd vergichtt, das wider in ist / da mit ist er erwunden. Wes er aber laugnet / das gepürt dem klager ze weÿsen.
¶Jnterrogare: ¶forschen oder fragen. Exāminare: ¶verhoͤren oder behoͤren. [Seite: 27] => Faksimile Confiteri: ¶bekennen. Negare: ¶laugnen.
[3.3.4] Zemercken in welch wege einem sein veriechen vnd bekennen schaden bringe / oder nicht.
Einer der vnder .xiiij. iaren ist / bekennet er ÿchtz wider in / schadet im nichts. Einer der durch genoͤte forcht / ÿchts bekennet schadet im nicht. Einer der auß irrung ÿchtz bekennet / vnd moͤcht die irrung bewaͤren / daz schadt im nicht. Einer der ÿchtz bekennet / das mit im waͤre / gelaubt man nichtt. Einer der ausserhalb seines widerteÿls oder des selben procurators / ÿchts bekennet / schadt im nicht. Einer der nit gancz lauter bekennet, Alz wider in für gehallten würt / schadet im auch nicht. [Seite: 28] => Faksimile Einer der ÿchtz bekannte / das nit natürlich waͤr / als das einer sein sun waͤr oder lebend waͤre / vnd erfunde sich / dz der selb zechen iar ellter dann er / oder tod waͤre, schadt im auch nicht. Ein edle oder fürgaͤnge person / die durch irrung oder einfaͤltikeÿt ÿchts bekannte vnd bewaͤrt anders / schadt ir nicht. Einer der ÿcht bekennt / von dem der krieg nit ist / das schadt im nichtt. Vnd warumb kompt es offt / dz man die partheÿen beid oder eine widerumb oder anderbaid verhoͤrt. Darnach vnd die sach gestalt ist / vnd das heÿßt resumiert. Vnd ist ze mercken / dz soͤlich obgemeltes fragen vnd verhoͤren der partheÿen / müntlich gen einander nit allweg beschicht / dann es ist nit in einer ÿeden sachen rechte / allein in den sachen / dÿe die sele an treffend, sol man mund gegen mund verhoͤren etc. [Seite: 29] => Faksimile So ist es auch allenthalben nit gewonlich, Dann mund gen mund / schrifft gen schrifft.
[3.4] [3.4.1] Nun ist ze mercken / ob der antwurter laugnet / wie der klager das pringen vnd erweÿsen sol
¶Probare: ¶weÿsen. ¶Probacio: ¶weÿsung.
Durch frische oder ware kuntliche tate der geschichten, Das heißt per euidenciam facti, Als ein schub oder da ein priester kinder in dem hauß hat / daz geÿt vrkund / dz er vnstaͤt ist / das ist incontinens. Durch beschawung des leibs / dz ist per aspectum corporis. Als vmb iungkfrawen vnd laͤmin vnd vmb wunden. Durch leÿmden / das ist famam / alz mit nachgepawren vnd gemeinem ruͦff / nit mit haußvolck / eehalten oder wenig personen / es sol gemein vnd vil leüten beruͤmt [Seite: 30] => Faksimile vnd kund sein. Durch aÿd schweren / dz ist per iuramenti dilationem / als der klager oder antwurter / sein iehen oder laugnen bestaͤtt / ob es im erteilt würt.
Per presumpcionem: Daz ist / da einer auß etwas geleÿchnuß / im in seinem gemuͦte fürnÿmpt / dem seÿ also etc. Vnd ist vierleÿ.
Einer der einen man sicht siczen oder sten beÿ einer frawen vnd mit ir reden / der sol nicht arckwonen oder im fürnemen / dz er von leÿplicher werck wegen mit ir rede. das heißt presumpcio temeraria / vnd tauget nit im rechten.
Einer der eÿnen sicht nackentt beÿ einer ligen / oder sicht in offt vnd dick in ein verleÿmtes hauß geen / oder hoͤrt vil von im sagen / heißt presumcio probabilis / wie wol das gar nachent beÿ dem zil ist. Yedoch sol der richter darauff nit vrteÿlen. [Seite: 31] => Faksimile Dann dÿe weÿsung sol gar lauter seÿn, dz man fleisch in fleisch gesechen hab. Es waͤr dann dz die zweÿ / die beÿ einander waͤren / mit einander ze krieg kaͤmen / vnd eins dem anderen des beweÿsen / laugent etc. / so hat es vnderschÿd.
Einer der einem seine pfand wider geÿt / dabeÿ ist für ze nemen / er hab in bezalt / vnd [heÿßt] presumpcio violenta vnd beẅget den Richter dar auff ze vrteilen / es werd dann anders geweiset. ¶Ein fraw hat lange zeÿt beÿ einem mann willigclich gewonet / vnd sprach sÿ waͤre nit mit irem willen im geben oder verheÿrat worden. Heißt presumpcio necessaria / vnd taugt nichtt.
Durch zeügen / dz ist per testes. Jn einer ÿeden sach seind gnuͦg zwen oder dreÿ zeẅgen die taugenlich sind. Quia in ore duorum vel trium stat omne verbum Dann in zweÿer oder dreÿer munde besteet ÿedes worte [Seite: 32] => Faksimile knechte / frawen vnder xiiij iaren / vnbescheiden / buͤbisch / toren / vnbesÿnnt / verleÿmpt leẅte Armleüte / die offenlichen nach dem almuͦsen geend / keczer / paͤnnig / aͤchtig / heiden / iuden / geschwisterget für vnd vnder einander / gedinget eehalten vnd dÿener für ir herrschafften. Ein laÿe wider ein priester / mügen nit zeügen sein.
[3.4.2] Zewgen darstellen: ¶Producere testes. Die zeügen sol man dar oder für stellen nach litis contestationem / vnd so man zuͦ weÿsung Zuͦ gelassen / dz ist admittiert / württ vnd die zeügen schweren in beÿder partheÿen oder ir procuratorum gagenwürtikeÿt / ÿeder also, Daz ich in der sache / darumb ich für gericht kommen bin Jn zeüges weise ein warheit sage / alz ichs weiß vnd gefraget würd. Vnd dz nit laße weder durch lieb / durch laid / durch freüntschafft / durch veintschafft / noch durch keinerleÿ sach willen. [Seite: 33] => Faksimile Welcher teÿl interrogatoria / dz ist / fragzedel / geben will / der sol daz alz dann tuͦn.
Vnd darnach nÿmpt der Richter ÿeden zewgen in sunderheÿt / einen nach dem anderen / das keiner den anderen hoͤre / vn fraget in / [von] wannen er seÿ / wie er heiß / wie alt er seÿ / ob er citiert seÿ / ob er die partheÿen kenne / ob er nicht an gelernt worden seÿ / was er sagen sülle / ob er keinen teyl ÿchts gewant seÿ / vnd ob er ÿedem teile seins rechten günne. Vnd auff die artickel vnd fragzedel vnd beschreÿbt gar ordenlich ir ÿedes sage / nach aller notdurfftt. Vnd beÿ dem verhoͤren süllen die partheÿen vnd aduocaten nicht sein.
[3.4.3] Durch besigeltt briefe / offen instrument einer stat recht buͦch Ein salbuͦch Eÿnung buͦch / dÿe bewaͤrt / gancz gerecht erkannt in gemeiner forme geseczt vnd gemacht [Seite: 34] => Faksimile von erberen leẅten redlich außgangen / vnd auffgericht / vnd gancz vnarckwaͤnig sind an insigel / an geschrifft / vnd an allen sachen.
Vnd soͤlich zeügknuß sol man in dz recht legen vör offenbarung der zeẅgen sage. Welche partheÿ des begert / die sol man die brieff hoͤren vnd besechen lassen / vnd abschrifft geben / da mit sÿ dar wider reden vnd außnemen müg.
[3.5] [3.5.1] Vnd wenn ÿeder teile sein zeügknuß also dar gelegt hat / die vermercket vnd beschriben sind. So seczet der richter alz dann den partheÿen tage ze offnen der zeẅgen sage / das heißt publiciert. So der selb tag erscheinet / lißt man der zeẅgen sag beiden partheÿen offenlich. Dar zuͦ bede partheÿ / vnd sunder die aduocaten ir notdurfft vnd disputaciones reden vnd sagen vnd begeren die sag in geschriffte [Seite: 35] => Faksimile vnd züg vnd taͤge wider die zeẅgen vnd sage / ze reden vnd excepiren nach ir not durffte.
Welcher teile züg vnd taͤge oder anders begerte / daz den anderen teil bedeücht nit recht vnd nicht mer dann verziechen / dz ist / dilaciones sein. Der redte dar wider / vnd begert im das nitt ze admittieren / sunder den weg ze vnderstengen / vnd ze verhalten das ist precludere viam.
Vnd wenn soͤlich einred vnd excepciones also ende haben / vnd ÿeder teile nit mer reden noch fürpringen will / das zuͦ dem rechten dienet So beschliessend sÿ / vnd seczend die sach zuͦm rechten / vnd heißt concludere.
[3.5.2] Darnach solt der richter die acta vnd für prachten allegaciones / vnd haͤnndel / eÿgentlichest er kan vnd mag / besechen vnd ist die sach groß / weÿser leẅt rate haben [Seite: 36] => Faksimile vnd auff ein genanten tag / den partheÿen verkünden / vnd dÿe sachen mit seinem endtlichen spruch / vnd vrteil entscheiden.
[3.6] Sentencia iudicialis Rechtliche vrteil / ist entscheidung / die den widerteÿlen vnd kriegen ende auff legt / durch erk[l]aͤrung des richters beschuldigung oder entschuldigung innhaltend. Vnd ist zweÿerleÿ rechtlich vrteÿl.
JNterlocutoria: Vnderschidlich vrteil ist die gesprochen ist zwischen anfang vnd ende der sachen / nit vmb die haubtsache, Aber über die auffwallend vnd einfallent frage. Alz vmb libell ze geben oder ze straffen / das ist corrigieren / züg vnd tag ze geben / oder nicht / vnd deßgeleichen etc. [Seite: 37] => Faksimile
Enndtlich vrteil. Diffinitiua ist dÿe die haubtsach entscheÿdet / beschuldigung oder entschuldigung mit sampt den schaͤden innhaltende.
Die vrteil sol gefellet werden von irem richter / das ist vor dem die sach gehanndelt ist / vnd für den sÿ gehoͤrt.
Der richter sol die vrteil siczent / vnd nit steend / an einer gewonlichen erberen stat in beder partheÿe beÿwesen / oder eines vngehorsamen teils abwesen / in geschriffte lesen vnd geben.
Vnd welicher teil beschwaͤrt würt an der vrteÿl / sÿ seÿ vnderschidlich oder enndtlich. Der mag sich da von beruͤffen / dinngen vnd appellieren. [Seite: 38] => Faksimile
[3.7] Appellacio / das ist Appellieren / ist beruͤffen / von dem mÿnderen zuͦ dem mereren richter / über ein vntauglich vrteil oder beschwaͤrnuß.
Man sol appellieren / von dem mÿnderen zuͦ dem mereren richter / vnd nicht herwider. Doch mag man von einem ÿedem weltlichen richter / on alle mittel für ein keÿser appellieren. Deß geleÿchen / von einem geÿstlichen richter für ein bapste. Jtem man sol appellieren / inner .x. tagen den naͤchsten / vnd die vrteil gesprochen ist.
Jtem man sol in geschrifft appellieren. Appostel / daz ist laßbrieff begeren Dem widerteil vnd dem richter in xxx tagen / die appellacion verkünden vnd copien geben. Darnach dÿe Appellacion in einem iare an den oberen richter / für den er sich beruͤffet hat / pringen. [Seite: 39] => Faksimile
Der hat denn macht / die gesprochen vrteil krefftigen vnd bestaͤten / oder vnkrefftig vnd übergeurteilt ze sprechen oder ze straffen.
Jtem vor dem selben / was nitt verhört oder fürpracht ist worden / mag verhoͤrtt vnd fürpracht werden. Jtem ein Bapst oder Keÿser mag auch ein commissari geben / dem er die appellacion / gar oder eins teils beuilcht.
Jtem ob ein Keÿser an der Appellacion saͤmig waͤre Oder der / der sich beruͤfft haͤt vnd der Appellacion / durch eehaffte nott nit vervolgen moͤcht / in iar vnd tage / mag im ein keÿser geben erlengerung etc. vnd heÿssend phatalia.
Jtem waz der ander teil über soͤlich appellacion vnd hangend rechte angesÿnte hat nitt krafft / vnd besunder ob er keinerleÿ neẅrung [Seite: 40] => Faksimile machte. Quia lite pendente nil debet innouari. Jn hangendem krieg sol nichts erneẅet werden. Vnd heissend attemptata.
Jm rechten sol nÿemant verkürczet werden. Vnd darumb / ob ein procurat / oder aduocat ein partheÿ gesampt Oder einer nach der conclusion / zeügknuß / brÿefe oder ander ware vrkund erfunden haͤte / der sol widerumb zuͦ seinem rechten gelassen werden.