Regimentsordnung Maximilians I. Niederösterreich 1502 :: Transkription Speer November 2013

Editorial

Transkription aus: österreichische Zeitschrift für Geschichte und Staatskunde ... 1837 S. 231f., 235f.
Vorlage: BSB-Digitalisat
Regest hierzu: , URI: RI XIV,4,1 n. 16113, in: Regesta Imperii Online (Abgerufen am 03.11.2013).

[Seite 231]

Das Regiment in Oesterreich. 1502.

Vermerkht die regierung So die Römisch kay. Mt. vnnser allergnedigister Herr zu ynsprugkh am Freyttag nach dem Sonntag Reminiscere anno XVc. vnd im anndern Jare, Jn yerer Kay. Mt. niderösterreichischen Landen aufgericht, Gemacht vnd fuergenomen hat, wie hernach vollgett.

Wier maximilian von gots genaden Römischer Künig zw allen Zeitten merer des Reichs zw hungern, dalmacien, croaten etc. Kinig, Ertzhertzog zw osterreich, hertzog zw Burgundi zw Brabanut vund phaltzgraw etc. Empietenn den Erwürdigen vnnd Ersamen Geistlichen, Anndächtigen, auch den edlenn Erbern weisen vnsern lieben vnd getrewen den von prelaten, Adl, Steten vnnd gerichten vnnd allen anndern vnnsern Landtsassen vnd vnderthanen in vnnsern fuerstenthumben vnnd lannden, osterreich, auch der Enns, Steier, kernnten, Crain, ysterreich vnnd Carst vnnser gnad vnnd alles guet. Euch ist allen unverporgen Wie wier nach weilent des aller durchlewchtigsten Fuersten, Herren Fridrichs Römischen kaysers vnnser lieben herren vnnd vaters hochlöblicher gedachnus Tott vund abgang Jn denselben vnnsern Fuerstenthumbn vnnd lannden Dieweil Wir dann ain Zeit lanng annder, vnnser, auch des heilligen Reichs vnd gemainer Cristennhait obligunder gescheft halben, persönnlich nicht Beywonen mochtn, ain ordnung vnd Regiment aufgericht vnd vnsern obristen Hawbtmann Stathaltern vnd Retten so wier darzue gesetzt vnnd geordennt, macht vnd gewalt geben, alles das So vnns als Regierunden herren vnd landsfuersten zuesteet vnd gebürt, von vnnsern wegen zw handlen vnd aufzwrichten, das allso durch sy mit getrewem vleiß Bescheen ist Vund wier vns aber kurtzlichen in die selben vunser fuerstenthumbn getan, vnnd erfundn, das den selben vnnsern obristen hawbtman, Statthaltern vnnd retten, verrer nicht woll möglichen gewesen ist Gericht vnnd Recht vnnd was vnnser cammerguet beruert neben andern zuefallunden sachen vnd gescheftn allein zw hanndlen vnd auszwrichten haben Wier deßhalben aus genediger gueter Maynung vnns selbs, auch vunsern Fuerstenthumbe vnnd landen vund lewten zw nutz vnd aufnemen von newem ain Regiment vnnd ordnung, vnnd durch welich personen hinfuer die gemellten vnnser Fuerstenthumbe vnnd lande an vnnser stat, vund in vunsern namen geregieret, vnnd versehenn werden sullen, aufgericht vnnd gemacht wie hernach vollgett.[Seite 232]

Am ersten setzenn vnnd ordnen wier zw vunsern obristen hawbtman desselben vunsers Regiments vnnd vunser niderösterreichischen lannde Nemblich den Edlen vnnsern lieben getrewen Wolfgangen herrn zw polhaim darnach zw vnnserm österreichischen Canntzler den Ersamen gelerten vnnsern lieben anndächtigen Doctor Georgen von neidegkh fürder so ordnen wier hiermit den ersamen gelerten, vnnsern lieb getrew Wilhalbmen von Losenstain, Johannsen Fuchsmagn Doctor, vnnd Leonharden Harracher zw vnnsern statthalltern vnnd Regennten obgemelts vnsers Regiments. Dieselben Vnnser obrist hawbtman Stathalter vnd Regenten sullen nach gemellten massen hanndln.

Am ersten sullen sy all vnnd yeglich hanndl Sachen vnnd Suplicacion so Jnen fuerfalln vnnd zuekumen Sy berürn vnns, vnnser lannd lewt vnd partheien vleissigklich hören, Beratten vnnd darinen das pest vnd nutzlichst füer vns dieselben vunser lanndlewt vnd Bartheien yrer pesten verstenntnus vnd aller pilligkhait auch der lannds gewonhaitn nach vnnser niderösterreichischen lannde handeln vnnd vnndter vnnserm Jnsigl oder secret so wier Jnen gegeben vnnd bevolchen haben vertigen.

Jtem sy sullen auch ainem yeden vnnsern vnndtersassen der selben vnnser land Jn was wierden stattes oder wesens die sein dem minsten als dem maisten Jn yeren henndl vnnd sachen hilf Ratt Beistandt vnnd alle pilligkait Es sey Jnner oder ausser lannds Jn vnnserm namen thun vnnd beweisen als ain lanndsfüerst seinem vndtertanen zutun schuldig vnd pflichtig ist.

Was sich auch zwischen vnnsern Ambtlewten, pflegern, vrbarsleuten Als prelaten, Stetten vnnd gerichten deßgleichen anndern vnnsern vndtersassen vnnd vnntertanen der perürten vnnser niederösterreichischen Fürstenthumb vnnd lannde, hochen vnnd nidern person Jn was wirden stats oder wesens die sein oder auch zwischen den selben vnnsern Ambtlewtenn pflegern vrbarslewten hindtersassen vnnd vnndertanen gegen anndern die nicht Jn denselben vnnsern lannden gesessen sein Jrrung vnnd spann begeben sollen vunser obrist hawbtman stathallter vnnd Regentn mit Wissen der partheien allen muglichen vleiß annkern ain yede sachenn guetlich hinzulegen vund zuvertragen, mag aber das nicht sein die alsdann an die ennde dahin sy gehert weisen vund darob sein das daselbst fürderlich vund austreglichen darinen gehandelt werde wie sich gebürt.

Jtem wann Jnnen auch ye zu zeitten treffenlich sachen füerfallen sulln vnnd mögen sy zw Jnen ervordern [Seite: 232.2] vnnser lieb getrew Sigmunden herren zw polhaim, Berntlmeen von Starhenberg, Michel von Trawn, Casparn von Rogenndorf, Casparn perkhaimer, Laslawen prager, Erharten Schweinbekh die wier Jnnen hierinen zw Retten von haws aus zugeordent haben ob sich auch in vnnsern niederösterreichischen Füerstenthumbn vnnd landen vundter vnnsern aignen vundterthanen aufrur begeben, Sullen sy die güetlich oder mit der Tatt abstellen vnnd die vungehorsamen straffen deßgleichen ob yemants vnnser lannde vberziehen oder beschedigen wollt, Sullen sy macht vnnd gewaldt haben Jn vunserm namen meingklich aufzupieten vnd ob sy zw solchen hanndl noch mer lewt vnnd geschütz dann auf dasselb auffpott erscheinen, bedurffen wurden dasselb sullen sy vnnser kriegskammer, die wier von newem aufgericht haben, verkunden, vnnd Jnnen die anzall der lewt anzaigen, darauf soll dieselb kriegskammer Jnen die zueschiken vnd bestellen, wann wier aber personnlich in denselben vnnsern Erblannden sein, wolln wier die gegenwer selbs hanndln vnnd bestellenn. [Seite 235]

Jtem sy sullen vnnd mügen auch all vnnd yeglich Edlmans, Burger vnnd bawrn Erblechen khains ausgenomen lechen vnnd darüber lechenprief fertigen, was aber vellige oder Jrrige lechen sein darinen auch mit den geistlichen Lechenschaften soll allzeit durich vnnser person nach vnnser ordnung gehanndlt werden ausgenomen die klainen geistlichen lechnschaften so an den Grenitzen ligen die nichts in absennti tragen die sulln sy Jn vnnserm namen leichen damit [Seite: 235.2] vnns der nichts Enntzogen werde doch bis auf vnnser verer Besteett.

Jtem der pergkwerchs hanndl halbn sullen sy die mit getrewem vleiß fürdern zw nutz vnnd aufnemen vnnser fron vnnd wechsel was sy aber guetlich nicht hinlegen mögen dasselb sullen sy allzeit füer vnnser Regiment zw Jnßprugg weisen verrer darinnen nach vnnser vund gemaines nutz notturft zu hanndlen.

Jtem was dann vnnser Rennt, nutz, güllt gefelle vnd Einkhomen in den obberürten vnnsern niederösterreichischen Fuerstenthumbn vnnd lannden berürt dasselb sulle durch die so Wier innsonderhait darzv verordent haben, gehanndlt vud ausgericht werden.

Vund zu dem allen sullen die genantn vnnser obrist Hawbtman Stathalter vnd Regenten, vnnser obrigkhait, herrlichkhait vnnd gerechtigkhait, auch menigkleich bey Recht vnnd Biligkhait, nach Jerem höchsten vermögenn hanndthaben vnnd scherbmen, vund hierinen mit getrewem vleiß alles das hanndlen vnnd tun, das getreu hawbtman, stathalter und Regentn Jrem herren zw thun schuldig vnnd phlichtig seyn.

Jtem dann der gericht vnnd Recht halben haben Wier verordent das vnser hofgericht in osterreich nun hinfuer zw der newenstat Jerlichen zw den vier Quattemer Zeitten gehallten, vnnd alle hanndl, sachen vnd Apellaciones es betreff aigen, lechen oder annders so ainer Rechtfertigung bedarf durch vnnser verordent hofrichter vnnd beysitzer verhert vnnd nach Jrem gewissen vnd aller pilligkhait Rechtlichen vnnd enntlichn Entschaidn werden Vnnd was also durich sy erkhannt vnnd gesprochen wierdet, dabey soll es on waigrung beleyben vnnd den gestrags vollziehung bescheen darinen sullen auch Vnnser obrist hawbtman Statthalter vnnd Regennten So oft das die notturft ervordert Excucion thun vnd ain yedn dapey hanndhabn vnd schermen.

Wier ordnen vnnd setzen auch, nachdem bißher die Bartheien durch Jhr Redner vund fuersprecheun Jn verhör vnnd Recht mit vill vberflüssigen vnd vnnotturftigen Reden vnd aufzugen lanng aufgehallten vnnd jn Cost vnnd schaden gefüert sein, das hinfüer an sollichem hofgericht der Clager vund anntburter jm Rechten nit mündlich gehert, Sonnder yede Barthey Jr klag anntwurt, Rede vund wider Rede vnd alles füerpringen jn dreyen schriften gegeneinander einlegen vnnd darüber von den partheienn ferrer kain schrifft angenomen, vnnd darauff fuerderlichen Erkant vnnd geurtaillt werden sulle, wie obsteet.

Vnnd damit wier des vngestuemen nachlauffens so vnns bißher von vnsernn vnndtertanen begegnet ist, vnnd dardurch wier zw zeiten in andern treffennlichen hanndln verhindert worden seyn, deßgleichen sy selbs der schweren Costen, den sy mit nachraisen gelitten haben, vertragenn, beleyben. So ordnen vnnd setzen Wier das der obgemellt doctor georg [Seite 236] von neidegkh vnnser oesterreichischer Canntzler nun hinfuero zw wienn sein vnnd nachgemellter massen handln soll, dem ist also ob yemands were der sich ob vnnsers lanndts Regiments oder hofgerichts hanndlung beschwert, Soll er die hören, vnnd versuechen die partheien guetlich von sollichen Beschwerungen zu weisen Mocht aber das nicht seyn vnns ainer yeden sachen mitsambt vndterrichtung der hanndlung darob sy sich allso beschwerten, Deßgleichen ob yemants genad Embter oder Beneficia von uns begert alles mit seinem Rate vnnd guetbedungken allzeit fuerderlich vnnd aigentlich in schrift berichten, vnd die partheien beschaidenn anhaim zwbeleiben vnnd auf ain bestimbt Zeit darinen ain Bott fueglichen zu vns vnnd widerumben zu Jme khomen mag den Wier auch nicht vber acht tag an vnnserm hof aufhallten wolln, wider zw Jme zw komen vnd anntwurt zwemphahen. Aber nichts destminder solle darzwischen dem, so dasselb landsRegiment vnnd Hoffgericht gehandelt, Erkhannt vnd gesprochen wierdet allzeit Execucion vnnd vollziehung bescheen, damit khainer durich des andern taills geverlich auszug an seinem Rechten vnnpillicher weiß aufgehallten verhindert, noch in Cost oder schaden gefuert werde. Doch wo wier alsdann erfunden das die partheienn solicher klag vnd beschwerung khainen grunt noch vrsachen vnnd die aus mutwilln oder geuere füergenomen hetten, Wellen wir gegen den selben darumb mit gepürlicher straf hanndln damit hinfüer annder solliches vermeiden vnnd sich zimblicher vnnd pillicher abfertigung vnnd beschaids benüegen lassen.

Jtem Er soll auch dem gemellten vnnserm lannds-Regiment ainen Secretary mit ainem Secret vnnd dann vnnserm hofgericht auch einen hofgericht schreiber zwordnen, vnd Jme die als ainem Cantzler gehorsam vnnd gewertig sein Er soll auch all Citacion, ladung vnnd vrtailbrief so an vnnserm hofgericht ausgeen, vertigen vnnd Sigillen, vnd sonnst in des hofgerichts sachen helffen hanndln wie wier Jme das in sonnderhait bevolchen haben.

Solliches alles wolltn Wier Ew nicht verhalltn vnd Emphelchen darauf Ew allen vnnd Ewer Jedem in sonnders ernstlich vnnd wollen das Jr sollichen obbestimbten ordnung vnd Regiment an vnser statt vund Jn vnserm namen gehorsam vnd gewertig seit vnd vnns darvber nicht nachvolget Sonnder was Ewer yeder zw hanndln vnd anzupringen hat das an den obgemellten ennden nach gelegenhait ainer yeden sachen thuet, und fuerbringet, vnd also vnns vnnd Ewch gehorsamblich erscheinet dann welicher das nicht Thett das wier vnns doch nicht versehen wurden Wier des beschwerung vnnd gegen Jme misfalln tragen darnach wiß sich Ewr yeder zw Richten vund Jr thuet daran vnnser ernstlichn meinung. Geben zw ynsprugg am Freytag nach den Suntag Reminiscere [Seite: 236.2] Anno domini fünffzehnnhundert vund in anndern vnnser Reich des remischen Jm XVII vnd der hungarischen Jm XII. Jarn.